Ko mi ɓaleejo

Komi ɓaleejo mo yarataa ƴiiƴe
komi ɓaleejo mo jibidinaaka e ñiiƴe
komi ɓaleejo caltiiɗo piile
komi ɓaleejo haa nanndumi e niile
komi ɓaleejo ceeɓɗo jiyle e hakkille

Komi gooto e maɓɓe jarlitiiɗo
mboɗo wiyi kurum haa nanndumi e jane cumɗe
mo sooyniimi sikkata ko mbolo gawde
jettiiɗomi yerondirami e gaɗa barme.

Mboɗo wiyi kurum
nguru ɓaleejo ngu mi hersiraani
komi gooto e maɓɓe tampere mum tan ɗaminiiɗo
ƴiiƴe miskineeɓe jaafiiɗo
warñeende maɓɓe haa darnga polliiɗo
komi gooto e maɓɓe pellitɗo
huutoreede haa ummital caltiiɗo
paɗe potal ɓoorniiɗo
jammbere pinal bakkiiɗo
goonga haa les ndallaaji e tillisaaji cunnotooɗo
cukke majjere haa wonta karaaje duugotooɗo

Hanki daabaa majjiranooɗo
njeeygu, ngostiigu kam e warngo mehre,
sikke alaa hannde yoɓe paam ɗo jeddi ngalaa
ɓaleejo ko bittoowo no maɓɓe
kiñoowo, daartoowo,
juurnatooɗo, bayloowo, pinndinoowo
ndeke so tawii ko´o daaba, ɗi keewii
ko eɓe nana, yiɗi jaɓa, yiɗi saloo
ciiɓagol ƴiiƴe yawtii
ngati hoodere ɓaleejo feeñii
yoo taw ko nde lewñoore haa ummital.


Kaaw Tokosel Tuure- Jowol.