Darnde enɗam Pulaagu yontii

Banndiraaɓe tedduɓe, enen poti semmbinde darnde enɗam ngotaagu pulaagu he winndere ndee, he mbaadi dental e kawral e pamoondiral, mbele enen tama semmbe mbaawoowo en reende he ɗii ngenndiiji Afrik, ɗi ɓe pecciri en keeri e kinɗe gollal e inɗe koɗanɗe, ɓayri ñannde fof enen nji’a bone maa nanen bone mbo ɓiɗɓe leñol men mbaɗetee he ndeer Afrik, ɗuum ko jemma e ñalooma, alaa ko waawta ɗum ittude so wonaa fiɓnde ngotaagu leñol fawiinde he kawral e pamoondiral e jinngiindirande, ngam hannde en panii fawtaade he ballal woɓɓe maa woytaade he pedle winndere, ɓayri kala semmbe deenoowo ɓiɗɓe leñol men enen tami, alaa ko ŋakki en so wonaa kawral, tee ngaal waawtaa wonde ɗoon ɗo en ndentaani he fiɓnde enɗam pulaagu e dogde piɓle ceeral foti ko ɗe diine maa ko ɗe dawrugol « politique ».

Sakiraaɓe tedduɓe, hannde mino sikki en paamii so en nanondiraani en njinngindiranaani en ngenɗondiraani, alaa ɗo laamotoɗen he Afrik, kadi ndeentoɗen daarti gaddooji cargu e ceeral hakkunde men ɗi añɓe men mbinndi, ndaroɗen ndadoɗen nehiren ɓiɗɓe men enndu enɗam pulaagu, ngitten nehirde ɓiɗɓe men arani en he ndeer Afrik, pooye duɗe janngire ɗemɗe Afrik kuɓɓen he ndeer duunde men Afrik, caloɗen faarnoraade ustaare, woni faarnoraade ɗemɗe e pine woɓɓe, annduɓe men jannginaaɓe ɗemɗe woɓɓe, ɓe mbiltinira gannde maɓɓe ɗemɗe men, kono wonaa ɓe ngona momtooɓe ɗe men.
Setodiiɓe ganndal e ɓamtaare leñol, Fulɓe mbii : lippuɗo furee ɗaccataa ñawɗo, lañcuɓe gaññeeje hoohooɓe men, heddataa wuurɓe men, kadi Fulɓe mbii : so jayngol taƴcii maayo, ñippirtee ko ƴiiƴam sagataaɓe, hannde sagataaɓe leñol men potii immaade, ngitta manna koyeere he ko’e men.

Tijjaani Mbaalo.
Jokkore : 00221 77 096 12 09 walla 00221 70 806 56 05.
Skype : tabital2