Keeri waawnere ceekaaɗi he hakkunde gori ŋadduɓe enndu wooturu he duunde men Afrik



Keeri waawnere ceekaaɗi he hakkunde gori ŋadduɓe enndu wooturu he duunde men Afrik
Banndiraaɓe tedduɓe, Keeri waawnere ceekaaɗi he hakkunde gori ŋadduɓe enndu wooturu he duunde men Afrik, gadduɗi ceeral nehdi e taƴu enɗam hakkunde cori (population) Afrik, enen poti ɗi salaade njaggen he fiɓnde ngotaagu Afrik, haa arti he enen Fulɓe sariiɓe saakiiɓe he kuuɓndi duunde Afrik, njaɓen konngol ceerno men Yero dooro Jallo, ko ɗemngal woni wonki leñol, caloɗen cargu pawiingu he jinngol hoɗannde maa hinnde gollal maa mbaadi maa yettoode maa fiɓnde dewal Geno maa dawrugol, ngonen he fiɓnde ngotaagu leñol men fawiinde he ɗemngal men.

Sakiraaɓe tedduɓe, nde ɗemngal nafata ɓiɗɓe leñol, ko maa ngal winndee, ngal janngee, ngal golloree he soklaaji yimɓe renndo maggal, ngal wiltiniree karalle yimɓe hoɗaango maggal.

Musidɓe tedduɓe, en potaani faarnoraade pulaagu tawa en kaalataa ɗemngal men en njanngataa ngal, en calaaki janngude ɗemɗe janane, kono ko no ɗe ngon sodorde waawde wiltinde karalle men e yaajnude coñce ɗemngal men, kono wonaa daraade na wi’a : ɗemɗe me mbelaani janngude.

Sakiraaɓe tedduɓe, alaa ko waawta ittude caɗeele ɓiɗɓe leñol men, so wonaa ngotaagu men, pawiingu he winndude e janngude ɗemngal men, ngam hannde so en ndaartiniima ko’e men, en tawat caɗeele men fof addi ɗe ko humambinaagu e ŋakkude faamde ko woni leñol, hannde leñol men ina sarii ina saaktii he kuuɓndi Afrik, hannde haa mbaawen rentinde ɓiɗɓe maggol he oo men yonta, ko alaa he sago annduɓe men e alɗuɓe men e dawriyankooɓe men, ndennda he fiɓnde wootere, ndeen woni nafa leñol, ɓayri en nji’ii : en ŋakkaaka annduɓe, en ŋakkaaka alɗuɓe, en ŋakkaaka dawriyankooɓe faamɓe, kono en ndonkii huufde cori (population) leñol men no haaniri nii, ngam haa hannde en ngalaa haalirde (Radio) Fulɓe jaggeteende he kuuɓndi Afrik, alaa ko haali he winndere ndee, kadi en ngalaa haalirde njiitam (TV) Fulɓe, ɗo mbaawten hollirde pine men e tawaa-tawi maamiraaɓe men, ko ɗuum waɗi naalankooɓe leñol ngol ngonti baayooɓe (Orphelin) he kaalire janane, jaayndiyankooɓe men ngonti tanngeteeɓe he kaalire janane, alaa ko waɗi ɗuum, so wonaa waasde paamoondiral he jinngangol nafa leñol e waasde faamde ko woni leñol.

Musidɓe tedduɓe, ngaree paamoondiren he ko feewti he ɓamtaare leñol men, ngam hannde yonta men lamndii ko : ngotaagu pawiingu he ganndal, pawingal he binndol e jinngiindirande e walloondirde e enɗoondirde e reende ewooɗe leñol men hade en ngaañcaade.
Mino yetta kala dariiɗo dadiiɗo he feɓnde ngottagu leñol men e kala daraniiɗo he momtugol humambinnaagu he duunde men Afrik.

Tijjaani Mbaalo.
Jokkore : 00 221 77 096 12 09 walla 00 221 70 806 56 05.
Skype : tabital2

Mercredi 25 Février 2015
Boolumbal Boolumbal
Lu 308 fois



Recherche


Inscription à la newsletter